Rholiau Selsig Fegan Rosie
(Gellir Eu Gwneud Yn Ddi-glwten)
Yn llawn blas, mae’r rholiau selsig hyn wedi diflannu’n gynt mewn partïon na’u cymheiriaid cigog! Mae’r harissa yn ychwanegu sbeis cynnil, tra bod y burum maethol yn ychwanegu blas caws a chnau. Perffaith ar gyfer partïon Cinio Mawr neu bicnic.
Cynhwysion
Ar gyfer y toes:
- 200g ‘menyn’ neu ‘floc pobi’ fegan (oeri)
- 250g blawd plaen (neu gymysgedd o flawd gwyn plaen neu gryf di-glwten sy’n cynnwys gwm xanthan)
- Pinsiad o halen
- 70ml o ddŵr oer
- Llaeth ceirch i sgleinio (dewisol)
Ar gyfer y llenwad:
- 300g o friwsion bara (rhowch unrhyw fara – mae hen fara’n iawn, neu fara di-glwten mai dyma beth rydych chi’n ei defnyddio, mewn prosesydd bwyd a’i dorri’n fân, neu ei grymblo’n fân iawn â llaw)
- 270ml Hufen planhigyn (neu hufen cnau coco, ond bydd hyn yn newid y blas ychydig)
- 2 lwy fwrdd burum maethol (powdr neu naddion)
- 1 winwnsyn mawr, naill ai wedi’i dorri’n fân iawn mewn prosesydd bwyd, neu wedi’i gratio
- 2 lwy de o bast harissa
- Halen a phupur i sesno
Dull
Cam 1
I wneud y toes, ychwanegwch y blawd a’r halen i bowlen gymysgu fawr a thorrwch y ‘menyn’ yn giwbiau a’i ychwanegu at y blawd. Defnyddiwch eich bysedd i rwbio’r menyn i mewn ond gadewch y gymysgedd yn dalpiog iawn (treuliwch tua 30 eiliad ar hwn!)
Cam 2
Ychwanegwch y dŵr oer yn araf nes bod toes yn ffurfio
Cam 3
Ar arwyneb â blawd arno (neu ddarn o bapur pobi), rholiwch y toes allan i ffurfio petryal
Cam 4
Plygwch y traean uchaf i lawr, a’r traean isaf i fyny (fel plygu llythyr)
Cam 5
Oerwch y toes yn yr oergell wrth i chi wneud y llenwad
Cam 6
Torrwch y bara’n fân mewn prosesydd bwyd (neu treuliwch lawer o amser yn ei grymblo’n fân iawn â llaw!), mae hen fara’n iawn, ac yn ffordd wych o ddefnyddio torth ffres ddoe!
Cam 7
Ychwanegwch y briwsion bara i bowlen gymysgu fawr ynghyd â gweddill cynhwysion y llenwad, cymysgwch y cwbl yn dda, bydd hyn yn ffurfio cymysgedd gludiog
Cam 8
Cynheswch y popty ymlaen llaw i 200°C ffan (220°C confensiynol
Cam 9
Rholiwch y toes i betryal mawr, tua 40cm x 25cm.
Cam 10
Rhowch y llenwad i lawr y canol i ffurfio selsig hir (i lawr yr hyd hir nid y lled)
Cam 11
Plygwch ddwy ochr y crwst i fyny a thros y llenwad, gan binsio at ei gilydd i ffurfio sêm
Cam 12
Trowch y cwbl wyneb i waered, fel bod y sêm ar y gwaelod a thorrwch hi’n 10 darn. Yna trosglwyddwch y rholiau selsig i silff bobi wedi’i leinio â phapur gwrthsaim, gan gadw’r sêm ar y gwaelod
Cam 13
Sgleiniwch y rholiau gyda llaeth ceirch (mae gwneud llinellau ar y top gyda chyllell finiog yn edrych yn bert ond mae’n gwbl ddewisol)
Cam 14
Pobwch y rholiau am 25 munud, trosglwyddwch nhw i silff oeri – maen nhw’n flasus yn boeth neu’n oer.
Am fwy o ryseitiau gan Rosie, mynd i: Rosie Brandreth-Poynter – rosieandralphbake.co.uk @rosiebrandreth
