Pysgod hallt a reis
Perffaith ar gyfer grwpiau mawr, rhowch gynnig ar y rysáit hwn ar gyfer pysgod hallt. Gellir ei gynyddu yn dibynnu ar nifer eich gwesteion!
Mae Clarice ac Audrey o’r grŵp cymunedol dielw bendigedig, Exercise for Everyone wedi bod yn ddigon caredig i rannu’r rysáit hwn. Ffodd Clarice rhag ansefydlogrwydd a helbul ei thref enedigol, Camerŵn, a daeth i’r DU fel ffoadur yn 2000.
Roedd hi’n dioddef o Anhwylder Straen Ôl-drawmatig (PTSD) mewn gwlad ddieithr, heb unrhyw gefnogaeth a dim unman i droi. Roedd hi mewn sefyllfa wael, yn isel ei hysbryd, dros ei phwysau a gyda thri o blant dan bump i’w magu ar ei phen ei hun. Trawsnewidiodd ei bywyd gydag ymarfer corff ac mae bellach yn helpu eraill i wneud yr un peth trwy ei hyfforddiant personol.
Mae rhaglen Exercise for Everyone yn dod â phobl ynghyd i fwynhau cwmni da, bwyd a chadw’n heini i gyd ar yr un pryd! Mae’r rysáit hwn yn rhad, yn iach ac yn faethlon a gellir ei wneud am lai na £1 y pen.
Cynhwysion
Gallwch brynu pysgod hallt yn y rhan fwyaf o archfarchnadoedd – fe’i gelwir hefyd yn bacalao neu bysgod sych. Mae’n rhan annatod o lawer o ddietau ledled y byd.
- 1 pecyn o bysgod hallt
- 1/4 chwarter bresych (wedi’i dorri’n fân)
- 1 winwnsyn mawr
- 1 tun o domatos mân
- 1 lwy fwrdd o biwrî tomato
- Sesnin (pupur du, halen, perlysiau cymysg, garlleg, pupur cayenne)
- 2 gwpan o reis
Dull
Cam 1
Sociwch y pysgod mewn dŵr oer am sawl awr (neu dros nos).
Cam 2
Berwch y pysgod nes ei fod wedi’i goginio (tua 5 munud).
Cam 3
Torrwch winwnsyn a’i ffrio’n ysgafn gyda sesnin, yna ychwanegwch y pysgod.
Cam 4
Ychwanegwch y tomatos mân a’r piwrî tomato, ac ychwanegwch fwy o sesnin (os oes angen). Coginiwch ar wres isel am hyd at 5 munud.
Cam 5
Torrwch y bresych yn stribedi tenau. Gorchuddiwch nhw a’u stemio ar wres isel nes bod y bresych yn barod.
Cam 6
Berwch y reis nes ei fod wedi’i goginio a’i weini gyda’r pysgod. Mwynhewch
Mwy am Exercise for Everyone
Mae Exercise for Everyone yn cydnabod bod pobl o grwpiau poblogaeth sydd dan anfantais economaidd-gymdeithasol yn llai tebygol o fod yn gorfforol, yn feddyliol ac yn emosiynol actif ac yn fwy tebygol o brofi canlyniadau iechyd andwyol.
Mae Exercise for Everyone yn fudiad nid er elw sydd â’r nod o ddarparu’r “lle i fynd” i’r difreintiedig yn y gymuned leol.
